X. mendean sortu zen, Nafarroako Erresuma defendatzeko. Muino batean dago, eta Erdi Aroko trazatuari ia bere horretan eutsi dio. Herriaren bi muturretan San Joan Bataiatzailearen eta Santa Maria de los Reyesen eliza gotortuak daude. Azkenhorren elizpea bikaina da, XII. mendeko harri gaineko polikromia egoera ezin hobean baitago. Handik gertu Abacial dorrea dago; antzinako gaztelu bat da, baina almenak erauzita eta kanpandorre izateko gaituta.
Kaleetan zehar ibilaldia egin ondoren, San Joan plazara iritsiko gara. Herrian jaiotako Samaniego alegilariaren jauregietxea dago han. Harlanduz egina da, eta oso portale neoklasiko ederra dauka. Gaur egun turismo-bulegoa dago bertan.
Eraikin zibilik zaharrenen artean, XIV. mendeko La Primicia etxea aipatu behar da. Etxe gehienetan sotoa dago, ondorioz, herriko lur azpia zulatuta dago erabat. Laguardia / Biasterin hainbat tradizio zibiko-erlijioso gorde dira. Ekainean ospatzen diren San Joan eta San Pedro jaiek xarma berezia dute.
